Maruxas de Nata, unha empresa de elaboración de galletas artesanais con presenza en máis de 200 establecementos gourmet de toda España e sede no pequeno concello de San Sadurniño, é unha das seleccionadas polo Xacobeo 2021 como patrocinadora deste evento. Xunto ás grandes firmas galegas, esta sociedade quixo ser partícipe dun acontecemento ao que outorgan unha especial trascendencia e “levalo alá onde se distribúen as nosas Maruxas”. Para iso, nada mellor que dedicar unha edición especial do seu envase ao Pórtico da Gloria, contando para as ilustracións co desenfadado estilo da artista ferrolá Elga Fernández Lamas, autora tamén do redeseño da marca hai un ano. Os seus debuxos reflicten a filosofía da empresa, “que pasa pola promoción dun modo de vida e de consumo ecolóxico, sostible e respectuoso co medio ambiente e pola reivindicación do rural e do produto local; uns valores que en absoluto entran en contradición” ‐aclaran‐ “coa innovación nin coa nova modernidade”. Alegría, cor, luz e enerxía son as características do deseño desta lata, que dá continuidade á colaboración con outros ilustradores como Leandro Lamas ou Blanca Vila, á que se debe a edición dedicada ás Meninas de Canido, un evento que puxo a este barrio de Ferrol entre as principais rutas de street art europeas. O envase é importante, pero o fundamental é o produto. As Maruxas son galletas de nata de produción ecolóxica e fabricación artesanal, elaboradas unha a unha, sen outro proceso mecánico máis alá do amasado. Fanse nunha pequena granxa familiar de Santa Mariña do Monte (San Sadurniño) que reforza a súa produción cando chegan datas especiais como o Nadal. A empresa conta coa certificación ecolóxica do Consello Regulador de Agricultura Ecolóxica de Galicia e cunha longa lista de premios nacionais e internacionais (Alimentos de España, Mujeres Emprendedoras, International Superior Taste&Quality Award, Zoco de Ouro, etc.). O segredo está na elaboración, con nata crúa ecolóxica, azucre de caña tamén ecolóxico e procedente do Brasil e fariña de trigo con xerme, moída en muíños de pedra, tal e como se facía antigamente. Precisamente desde a empresa consideran que estes acontecementos que estamos a sufrir conciencian cada vez máis á sociedade da necesidade de cambiar hábitos, comportamentos e consumo. “Hai máis conciencia dos beneficios da alimentación natural e ecolóxica, non só para a saúde, senón tamén para o medio ambiente, así como da importancia do benestar animal, a sostibilidade e o comercio xusto”, aseguran. (Nota de Prensa, diciembre 2020)